Müddətli əmək müqaviləsində 5 il tələbi necə tənzimlənir? (3 Misalla izah)

Satışı yalnız kitabxanalarda davam edən "Əməyin uçotu: A-dan Z-yə" (III nəşr) kitabından seçmə

Məsələ ilə bağl ikinci məqam odur ki, müddətli əmək müqaviləsi Məcəllənin 47-ci maddəsi ilə müəyyən edilən hallar istisna olmaqla bağlanır.
Əmək Məcəlləsinin 47-ci maddəsi haqqında növbəti səhifələrdə məlumat verilib. Misal üçün, işçinin əmək qabiliyyətini müvəqqəti itirməsi və ya təbii və iqlim şəraitinə və ya işin xüsusiyyətinə görə il boyu görülə bilməyən mövsümi işlərin yerinə yetirilməsi zamanı müddətli əmək müqaviləsi imzalanmasına icazə verilir.
Mİsal.  İşəgötürən Şuşa şəhərində inzibati binanın tikilməsi ilə bağlı tenderin qalibi olub. Tenderin şərtlərinə əsasən, inzibati binanın tikintisi 3 ilə başa çatacaq. Bu halda işəgötürən həmin layihədə çalışan işçilərlə müddətli əmək müqaviləsi imzalaya bilər.
Müddətli əmək müqaviləsinin maksimum müddətinə gəlincə isə, Əmək Məcəlləsinin 45-ci maddəsinin beşinci hissəsinə əsasən, müddətli əmək müqaviləsi fasiləsiz olaraq 5 ildən artıq müddətə davam edərsə, müddətsiz əmək müqaviləsi hesab edilir.
Mİsal 1. İşəgötürən 2016-ci ilin yanvar ayında işçini 1 illik müddətə işə qəbul edir. İşəgötürən hər il müqavilənin müddətini 1 il artırıb. Artıq 2021-ci ilin yanvar ayından əmək müqaviləsinin müddətinin daha bir il artırılmasına icazə verilmir. Çünki əmək müqaviləsinin müddəti beş ili ötdükdən sonra müddətsiz hesab olunmalıdır. 
Mİsal 2.  Tikinti sektorunda fəaliyyət göstərən işəgötürən işçi ilə 2 illik müddətli əmək müqaviləsi bağlayıb. İşəgötürən əmək müqaviləsinə xitam verdikdən 6 ay sonra, yenidən həmin şəxslə 4 illik müddətli əmək müqaviləsi imzalayır. Misaldan göründüyü kimi, işəgötürən və işçi arasında bağlanan əmək müqaviləsinin cəmi müddəti 6 il olub, amma hər iki müqavilə müddətlidir. İşçinin əmək müqaviləsinin müddəti 6 il olduğu üçün müddətsiz hesab olunmalıdır? 
Göründüyü kimi,  işçinin iki müqaviləsi arasında 6 aylıq fasilə olub. O səbəbdən də, Məcəllədə nəzərdə tutulan 5 illik müddət fasiləsiz davamiyyət tələb etdiyindən misalımıza uyğun olaraq 4 illik müddətli müqaviləsinin imzalanmasında hər hansı qanun pozuntusu yoxdur.