Ezamiyyə ilə bağlı diqqət yetiriləsi 3 VACİB MƏQAM

“Əməyin uçotu: A-dan Z-yə” kitabından seçmə

Ezamiyyətlərin necə hesablanması ilə bağlı geniş məlumat verməmişdən öncə, bəzi vaciq məqamlara toxunmaq istəyirik.

1. Xidməti ezamiyyətlər təşkilat rəhbərinin əmri ilə konkret məqsəd üzrə  xidməti tapşırığın icrası məqsədi ilə həyata keçirilir.

Ezamiyyə ilə bağlı əmrin verilməsi mütləqdir və həmin sənədə ezam olunan şəxs, təyinat məntəqəsi, müddət, məqsədi və s. məlumatlar qeyd olunmalıdır.

2. Ezamiyyətə yalnız işəgötürənlə əmək münasibətlərində olan, müəssisədə əmək müqaviləsi ilə işləyən işçi göndərilə bilər.

Bəzən təcrübədə xidməti müqavilə ilə işləyən işçilərin vəya təsisçilərin ezamiyyətə göndərilməsinə rast gəlinir ki, bu, yanlışdır. Əmək müqaviləsi ilə işləyən işçilər o cümlədən, müvəqqəti və daimi əmək müqaviləsi ilə işləyən bütün işçilər o cümlədən, mövsümi, əvəzçiliklə, tam olmayan iş günü çalışanlar ezamiyyəyə göndərilə bilər.

3. Ezamiyyətə gedən işçinin xidməti tapşırığı yerinə yetirəcəyi yerin daimi iş yerindən kənarda olması əsas şərtdir.

Bəzən işəgötürənlər satış menecerlərin məhsul təbliğatı məqsədilə Bakı şəhərindəki səfərini xidməti ezamiyyə kimi rəsmiləşdirilirlər. Ezamiyyə ilə bağlı qaydalarda işçilərin ezamiyyətə göndərilməsi ilə bağlı “daimi iş yerindən başqa yerə”, “yaşayış məntəqəsinə”, “təyinat məntəqəsinə” kimi anlayışlardan istifadə olunur. İşçilərin bir yaşayış məntəqəsi daxilində hərəkəti (səfərləri) ezamiyyə hesab olunmur. Baş idarədən filiallara və əksinə, filiallardan baş idarəyə istehsal zərurəti ilə bağlı xidməti səfərlər qanunvericiliyə uyğun olaraq ezamiyyət kimi qəbul olunur.