İstehsal sahəsindən malların pərakəndə formada təqdim edilməsi maliyyə sanksiyasına səbəb olacaq?

Satışı yalnız kitabxanalarda həyata keçirilən "Vergi uçotu: A-dan Z-yə" (VII nəşr) kitabından seçmə

Vergi Məcəlləsinin 50.1.3-cü maddəsi yeni redaksiyada təsdiq edilib. Həmin maddəyə əsasən, malların bu Məcəllənin 58.8-ci maddəsində göstərilən sənədlər əsasında alınmasına, malların elektron qaimə-faktura əsasında təqdim edilməsinə, topdansatış ticarət və istehsal obyektlərindən, habelə anbarlardan malların pərakəndə satış qaydasında rəsmiləşdirməklə təqdim edilməsinə, habelə malların vergi ödəyicisinin bir təsərrüfat subyektindən (obyektindən) digər təsərrüfat subyektinə (obyektinə) göndərilməsi zamanı bu Məcəllənin 71-1.5.10-cu maddəsində nəzərdə tutulan növdə elektron qaimə-fakturanın tərtib edilməsinə nəzarət edilməsi operativ vergi nəzarəti əhatə edən hallara aid edilir.
Təcrübədə rast gəlinən hallardan biri də istehsal fəaliyyəti ilə məşğul olan bəzi vergi ödəyiciləri tərəfindən malların təqdim olunmasının pərakəndə satış qaydasında rəsmiləşdirilməsidir.
Misal. Kolbasa məhsullarının istehsalı ilə məşğul olan vergi ödəyicisi bəzi marketlərə mallar təqdim etdikdə, qarşı tərəf elektron qaimə-fakturanın göndərilməsini istəmədiyindən tərəflər arasında hesablaşmalar qeyri-rəsmi şəkildə həyata keçirilir. İstehsalla məşğul olan vergi ödəyicisi malların topdan təqdim edilməsini rəsmiləşdirə bilmədiyi üçün qanunsuzluğa əl atır, malların təqdim edilməsini təsdiq edən nəzarət-kassa aparatının çeklərini sənədlərə əlavə edir.
Məhz yuxarıda qeyd edilən halların olmaması üçün, vergi orqanı operativ vergi nəzarətinin əhatə dairəsinə istehsal obyektlərindən, habelə anbarlardan malların pərakəndə satış qaydasında rəsmiləşdirməklə təqdim edilməsinə nəzarət tədbirlərini əlavə edib. Bir məqamı qeyd edək ki, Vergi Məcəlləsinin 58.13-cü maddəsinə edilən dəyişikliyə əsasən, topdansatış ticarət və istehsal obyektlərindən, habelə anbarlardan malların pərakəndə satış qaydasında rəsmiləşdirməklə təqdim edilməsinə görə – malları təqdim edən şəxsə təqvim ili ərzində belə hala birinci dəfə yol verdikdə təqdim edilmiş malların satış qiymətinin 10 faizi, ikinci dəfə yol verdikdə 20 faizi, üç və daha çox dəfə yol verdikdə 40 faizi miqdarında maliyyə sanksiyası tətbiq edilir.