Hansı şəxslərin övladları da gəlir vergisi üzrə güzəşt hüququndan faydalanacaq?

Satışına START verilən "Vergi Qanunvericiliyi və Şərhlər Toplusu 2023" kitabından seçmə

Vergi Məcəlləsinin 102.4.2-ci maddəsinə edilən dəyişikliyə əsasən, 1990-cı il yanvarın 20-də SSRİ qoşunlarının müdaxiləsi nəticəsində, habelə Azərbaycan Respublikasının ərazi bütövlüyünün müdafiəsi zamanı həlak olmuş şəxslərin valideynləri və arvadları (ərləri) ilə yanaşı, övladları da muzdlu işdən vergi tutulmalı olan aylıq gəliri üzrə 100 manat güzəşt hüququndan faydalanacaq.

Maddə ilə bağlı diqqət yetiriləsi vacib məqam ondan ibarətdir ki, Vergi Məcəlləsinə əlavə edilən 1-1-ci maddəyə əsasən, şəhid ailəsi statusu verilmiş şəxslərin valideynlərinin, dul arvadlarının (ərlərinin) və övladlarının hər hansı muzdlu işdən vergi tutulmalı olan aylıq gəliri 800 manat məbləğində azaldılır. Azərbaycan Respublikası Nazirlər Kabinetinin 15 yanvar 1994-cü il tarixli, 10 saylı qərarı ilə təsdiq edilən “Şəhid adının əbədiləşdirilməsi və şəhid ailələrinə edilən güzəştlərin tətbiqi qaydalarının 1.2-ci bəndinə əsasən 1990-cı ilin yanvarında Bakı şəhərində, Lənkəran və Neftçala rayonlarında faciəli hadisələr nəticəsində həlak olanlar da şəhid hesab edilir.
Vergi orqanın yanaşması ola bilər ki, Vergi Məcəlləsinin 102.4.2-ci maddəsi xüsusi norma olduğu üçün, 1990-cı il yanvarın 20-də SSRİ qoşunlarının müdaxiləsi nəticəsində, habelə Azərbaycan Respublikasının ərazi bütövlüyünün müdafiəsi zamanı həlak olmuş şəxslərin valideynləri və arvadları (ərləri) ilə yanaşı, övladları da muzdlu işdən vergi tutulmalı olan aylıq gəliri şəhid ailələri üçün nəzərdə tutulan 800 manat yox 100 manat məbləğində azadılmalıdr.