Sabit vergi ödəyicisi hansı hesabatlar verməlidir?

“Vergi uçotu: A-dan Z-yə” kitabından seçmə

“Sadələşdirilmiş vergi üzrə sabit məbləğin ödənilməsi haqqında qəbz” alan şəxslər vergi orqanına bəyannamə təqdim etməsə də, məcburi dövlət sosial ayırmaları haqqında vergi orqanlarına hesabat verməlidirlər.
Misal üçün, fərdi qaydada Bakıda fəaliyyət göstərən vergi ödəyicisi vergi orqanlarına 30 manat ödəməklə yanaşı, minimum əmək haqqının 20 faizi, yəni 36 manat (180 x 20 faiz) miqdarında məcburi dövlət sosial sığorta ayırması həyata keçirməlidir. Həmçinin, hesabat rübündən sonrakı ayın 20-sindən gec olmayaraq, vergi orqanlarına sosial hesabat təqdim etməlidir. “Sadələşdirilmiş vergi üzrə sabit məbləğin ödənilməsi haqqında qəbz” alan şəxslərin əksəriyyəti fəaliyyət göstərmək üçün onlara xüsusi yer lazım olur.
Misal üçün, bərbər, dərzi, çəkməçi, saat təmiri və digər fəaliyyətlə məşğul olan şəxslər ofisdən istifadə etdikləri halda icarə müqaviləsi bağlamalıdır və qarşı tərəf vətəndaş və ya fərdi sahibkar olduqda ödəmə mənbəyində 14 faiz vergi tutub dövlət büdcəsinə ödəməlidir. Deməli bu halda, “Sadələşdirilmiş vergi üzrə sabit məbləğin ödənilməsi haqqında qəbz” alan şəxs vergi orqanlarına rübdən sonrakı ayın 20-sindən gec olmayaraq, Ödəmə mənbəyində tutulan vergi bəyannaməsini də təqdim etməlidir.