Kameral vergi yoxlaması zamanı vergi ödəyicisi ƏDV qeydiyyatına alınarsa, 177.5-ci maddəsi tətbiq edilə bilər?

Dövlət Vergi Xidməti suala aydınlıq gətirir

Sual: Müraciətim Vergi Məcəlləsinin 177.5-ci maddəsi ilə bağlıdır. Fərz edək ki, 2023-cü ilin mart ayinda vergi orqanı tərəfindən "A" MMC üzrə kameral vergi yoxlması keçirilmiş və məlum olub ki, 2022-ci ilin Dekabr ayinda dövriyyə həcmini keçib. Buna görə 01.12.2022-ci il tarixinə məcburi ƏDV qeydiyyatına alınıb. Sualım ondan ibarətdir ki, "A" MMC Dekabr ayının sonlarında, Yanvar-Fevral aylarında yazılmış E-qaimələrə 177.5 maddəsi üzrə düzəliş edə bilər?

Cavab:  Bildiririk ki, Vergi Məcəlləsinin 177.5-ci maddəsinə əsasən qeydiyyat bu Məcəllənin 157.3.3-cü maddəsinə uyğun olaraq keçmiş tarixlə aparıldıqda, vergi ödəyicisi qeydiyyatın qüvvəyə mindiyi tarixdən etibarən vergiyə cəlb edilən əməliyyatlar üzrə ƏDV ödəməlidir və vergi ödəyiciləri üçün müəyyən edilmiş qaydada vergi məbləğlərini əvəzləşdirmək hüququna malikdir.

Eyni zamanda, Vergi Məcəlləsinin 157.3.3-cü maddəsinin müddəalarına əsasən bu Məcəllənin 85.4-cü maddəsi ilə müəyyən edilmiş 3 il müddətindən çox olmamaqla, vergi ödəyicisinin qeydiyyat haqqındakı ərizəsində göstərilən tarixdə ƏDV-nin məqsədləri üçün könüllü qeydiyyata dura bilər.

Göründüyü kimi, Vergi Məcəlləsinin 177.5-ci maddəsinin müddəaları yalnız könüllü ƏDV qeydiyyatı zamanı tətbiq olunur.

Bununla yanaşı, vergi ödəyicisinin ƏDV qeydiyyatı qüvvəyə mindikdən sonra vaxtilə təqdim edilmiş mala görə alıcıya verilmiş elektron qaimə-faktura dəqiqləşdirilməklə satılmış malın ƏDV-siz dəyəri və ƏDV məbləği müvafiq xanalarda əks etdirilməsinə vergi qanunverciliyində məhdudiyyət nəzərdə tutulmamışdır.

Əsas: Vergi Məcəlləsinin 157-ci və 177-ci maddələri.