İşəgötürən arayış hazırladıqda nələrə diqqət yetirməlidir? (Nümunəvi formalar)

Satışı davam edən "A-dan Z-yə: Kargüzarlıq" (V nəşr) kitabından seçmə

Əmək Məcəlləsində də işçilərə verilən arayışlarla bağlı ayrıca maddə var: “Maddə 88. İşçiyə arayışların, xasiyyətnamənin verilməsi və onların başqa yerlərə göndərilməsi şərtləri

1. İşəgötürən işçinin müraciəti əsasında ona vəzifəsi (peşəsi), müvafiq dövr ərzində qazancı barədə arayış, arxiv məlumatları, şəxsi sənədlərinin təsdiq edilmiş surətlərini, habelə onun peşəkarlıq, işgüzarlıq səviyyəsini və digər şəxsi xüsusiyyətlərini xarakterizə edən xasiyyətnamə verməyə borc­ludur”.

----------------------------------------------------------------------------------

Unutmayın:

Təyinatında, ünvanlandığı şəxsdən, müəssisədən asılı olmayaraq arayışlarda “Arayış verilir Əhmədov Niyaz Məmməd oğluna, ondan ötrü ki, o həqiqətən “Alov” MMC-də mühəndis vəzifəsində çalışır” kimi şablonlardan və ifadə formalarından imtina etmək vaxtıdır. Bu tip forma rus dilinin qrammatikasına uyğundur və artıq köhnəlmişdir. Digər tərəfdən, sənədin adı arayışdırsa, yenidən mətndə onu vurğulamağa ehtiyac yoxdur, sadəcə tələb olunan məlumatı sadə şəkildə ifadə etmək kifayətdir.

 ----------------------------------------------------------------------------------

Nümunə (xarici arayış):

Blank

№_____                                                                                  11 oktyabr 2018-ci il

ARAYIŞ

                Məmmədov Saleh Rüstəm oğlu 10.03.2011-ci il tarixindən “Alov” MMC-də mühəndis vəzifəsində çalışır.

                Arayış ______Bank ASC-yə təqdim etmək üçün verilir.

Direktor______  Nüsrət Nəbili

İnsan resursları üzrə mütəxəssis________Nailə Namazova

Möhür

----------------------------------------------------------------------------------

Nümunə (xarici arayış):

Blank – “Nurtikinti” (podratçı təşkilat)

№_____                                                                                    09 sentyabr 2019-cu il

“Alov” MMC-nin direktoru

                                                       Nüsrət Nəbiliyə

ARAYIŞ

Gəncədəki obyektdə tikinti işlərinin dayandırılması haqqında

                Azərbaycan Respublikası Ekologiya və Təbii Sərvətlər Nazirliyinin Milli Hidrometerologiya Departamentinin məlumatına görə, Gəncə şəhərində 08.09.2019-cu il tarixində saat 12.00-dan 15.15-ə qədər küləyin sürəti saatda 20-22 metr olmaqla, güclü leysan müşahidə olunmuşdur.

                Əlverişsiz hava şəraiti ilə əlaqədar ticarət mərkəzinin tikintisində işlər 4  (dörd) saat dayandırılmışdır.

Direktor  ____________Rüstəm Şalıyev

Möhür