Müəssisədaxili intizam qaydaları tərtibində ən çox yol verilən səhvlər

Satışı davam edən "A-dan Z-yə: Kargüzarlıq" (V nəşr) kitabından seçmə

Qaydaların tərtibində məzmunla bağlı ən çox rast gəlinən səhvlərdən biri belə sənədin Əmək Məcəlləsinin müvafiq maddələrinin köçürülməsi (copy-paste) əsasında formalaşdırılmasıdır ki, bu yolverilməzdir. Çünki bu halda qaydaların tətbiqinin heç bir praktiki əhəmiyyəti olmur. Əgər işçi ilə işəgötürən arasında yuxarıda qeyd etdiyimiz nümunələrdə göstərilən səbəblərdən əmək mübahisəsi yaranacaqsa, o zaman belə qaydaların heç bir faydası olmayacaq. 
Təcrübədə əmək qanunvericiliyinə zidd olan müəssisədaxili intizam qaydalarının tərtibinə də rast gəlinir. Bəzi işəgötürənlər hesab edirlər ki, qanunvericilikdə işçilərlə bağlı müəyyənləşdirilmiş normaları məhdudlaşdıraraq tətbiq edə bilərlər. Belə səhvlərə bariz nümunələr kimi, işçilərin məzuniyyət hüququnun pozulması (əmək məzuniyyətinin hissə-hissə verilməsinin qadağan edilməsi), qanunvericilikdə nəzərdə tutulmayan intizam tənbehi tədbirlərinin tətbiqi (kollektiv müqavilə olmayan müəssisələrdə cərimə kimi əmək haqqıdan tutulmalar həyata keçirilməsi), sınaq müddəti dövründə işçi ilə əmək müqaviləsi bağlanılmaması və 6 günlük iş həftəsində işçinin iş saatlarının həftəlik normadan (40 saatdan) çox təsbit edilməsini misal göstərmək olar.
Qaydaların tətbiqi ilə bağlı ən çox rast gəlinən səhvlərdən biri də işçilərin sənədlə tanış edilməməsidir. Yaxşı olar ki, müəssisənin hər biri işçisi qaydaları tam şəkildə oxuduqdan sonra sənədlə tanış olduğunu imzası ilə təsdiq etsin. Düzdür, əmək qanunvericiliyində bu barədə hər hansı birbaşa müddəa yoxdur, “İşəgötürənin əsas vəzifələri və məsuliyyəti” adlı 12-ci maddədə də işəgötürənin üzərinə işçiləri qaydalarla tanış etmək öhdəliyi qoyulmayıb. Ancaq Əmək Məcəlləsinin 10-cu maddəsində əmək müqaviləsi üzrə işçinin əsas vəzifələrindən biri “əmək intizamına və müəssisədaxili intizam qaydalarına əməl etmək”dir (“b” bəndi). Eyni zamanda, Məcəllənin 11-ci maddəsi ilə işəgötürənə “işçilər əmək müqaviləsinin şərtlərini, müəssisədaxili intizam qaydalarını pozduqda qanunvericiliklə müəyyən olunmuş qaydada onları intizam məsuliyyətinə cəlb etmək” (“d” bəndi) hüququ verilib.
Bütün bu deyilənləri nəzərə alaraq, qaydaların sonuna tanışlıq vərəqinin əlavə edilməsi məqsədəuyğun olardı. Əmək müqaviləsi imzalamış işçilər işə başlamazdan öncə mütləq imza atmaqla sənədlə tanış edilməlidir. Bundan əlavə, sənədin iş yerində bütün işçilər üçün əlçatan, görünən yerdə asılması vacibdir ki, işçilər ehtiyac duyduqları vaxt qaydalara təkrar nəzərə yetirə bilsinlər. Tanışıq vərəqinə gəlincə, onun qaydaların əlavəsi kimi təsdiq edilməsi tövsiyə olunur.