Sosial hesabatlar üzrə Şəxsi vərəqə: Texniki problemin maddi fəsadları

Xəbər verdiyimiz kimi, vergi ödəyicilərinin sosial hesabatlarının təqdim olunması və ödənişlərin şəxsi vərəqədə qeyd olunması ilə bağlı ciddi problem yaranıb. Belə ki,  2019-cu ildə olan şəxsi vərəqə işlənilmədiyindən “Sosial üzrə bölüşdürülməmiş ödənişlər” hissəsinə qeyd edilir. Nəticədə proqram şəxsi vərəqədə yaranan borca görə faiz hesablamağa başlayır və borcun ödənilməsi barədə bildiriş göndərir.

Həmkarlarımız mks.az saytına müraciət edərək, bu məsələni ictimailəşdirdiyimiz təşəkkkürlərini bildiriblər, eyni zamanda problem haqqında fikirlərini bölüşüblər. Möhübbəli Nağıyev adlı həmkarımız problemin həllinə pessimist yanaşır: “Yanvar ayından vergi orqanlarına 8 məktubla müraciət etmişəm və 195-ə zəng edib problemin həll olunmasını xahiş etmişəm. Bu gün yenə də bank hesabıma sərəncam qoyulub. Bir məktub da bu gün yazdım. Hami deyir ki bizlik deyil. Kimlikdir, bilən yoxdur. Bu problem həll olunana oxşamır.”

Zaur adlı həmkarımız isə bank hesabından sərəncam vasitəsilə silinən vəsaitin şəxsi hesabda görünməməsindən narahatdır: “ Bank hesablarına sərəncam gəlir. Hesabdan silinən məbləğ isə şəxsi hesab vərəqəsində görünmür. Pul hara gedib, məlum deyil...”

Vidadi müəllim isə hesab edir ki, vergi orqanlarının proqram təminatında problemlər mövcüddur: “Yaxşı olardı ki, proqramı əvvəlcə test edəydilər, 195-ə zəng edib deyirəm ki,dekabr ayında pul ödəyəndə peniyamız yox idi, mənim dekabrda ödədiyim vəsaitə yanvar ayında niyə peniya tutulur, cavab bu oldu ki, problem proqramdadı”

Sonda həmkarlarımıza bildirmək istəyirik ki, problem qısa zamanda həll olunmazsa, mks.az saytı vergi ödəyiciləri adından vergilər naziri cənab Mikayıl Cabbarova rəsmi müraciət etməyi planlaşdırır. Ümid edirik ki, vergi orqanları sosial hesabatlarda yaranan texniki problem nəticəsində borc məsələsinin həllinə operativ reaksiya verəcəklər.